Ilhom Aliyev yil oxirigacha Armaniston bilan tinchlik shartnomasi imzolanishi mumkinligini aytdi

Ozarbayjon prezidenti Ilhom Aliyev 2023-yil oxirigacha Armaniston bilan tinchlik shartnomasi imzolanishi mumkin, deb hisoblaydi.

“Agar Armaniston Ozarbayjonga qarshi har qanday hududiy da’volaridan voz kechsa, yil oxirigacha tinchlik bitimi imzolanishi mumkin... Biroq bu amalga oshmasa, tinchlik bo‘lmaydi. Va bu mintaqa uchun yaxshi ssenariy emas, bu barqarorlik va xavfsizlikka olib kelmaydi. Shu bilan birga, geosiyosiy vaziyatning o‘ta nozikligini inobatga olsak, bu kelajakda qiyinchilik tug‘diradi”, — dedi Aliyev.

Shu bilan birga, u Armaniston Qorabog‘ni Ozarbayjonning bir qismi sifatida tan olganidan keyin tinchlik shartnomasini imzolash bosqichi boshlanganini ma’lum qildi.

“Armaniston so‘nggi qadamni qo‘yishi kerak... Ular Qorabog‘ Ozarbayjon ekanini allaqachon tan olishdi, buni ochiq e’lon qilishdi va endi hujjatni imzolash bosqichi boshlandi. Bu nihoyatda muhim so‘nggi qadam”, — dedi Ozarbayjon rahbari.