Emmanuel Makronning BRIKS sammitida ishtirok etish bo‘yicha iltimosi rad etildi

Fransiya prezidenti Emmanuel Makron iltimos qilganiga qaramay, Janubiy Afrikada bo‘lib o‘tadigan BRIKS sammitiga taklifnoma olmadi.

BRIKS sammiti bu yil Yoxannesburgdagi Sandton konferensiya markazida bo‘lib o‘tadi. U eng yirik sammitlardan biriga aylanishi kutilmoqda: allaqachon 70 ta davlat rahbarlariga taklifnomalar yuborilgan.

“Ammo AQSh, Buyuk Britaniya va Fransiya kabi G‘arb davlatlari taklif qilinmadi. Fransiya prezidenti Emmanuel Makron taklifnoma so‘raganiga qaramay, u rad etildi”, — deb yozdi News24 nashri.

Janubiy Afrikaning BRIKSdagi vakili, professor Anil Suklal sammitga barcha 54 ta Afrika davlati rahbarlari taklif qilinganini aytdi. 

Suklalning aytishicha, ko‘plab davlat rahbarlari sammitda ishtirok etishdan manfaatdor bo‘lgani sababli Janubiy Afrika prezidenti Siril Ramafosaga qo‘ng‘iroq qilib, taklifnoma so‘ragan.