Xitoylik mutaxassis butun dunyoda kuzatilayotgan ekstremal issiq havo sababini aytdi

Bu yil butun dunyodagi, xususan, Xitoydagi ekstremal jaziramaga global isish jarayonlarining rivojlanishi sabab bo‘ldi, deb tushuntirdi Xitoy Fanlar akademiyasi Atmosfera fizikasi instituti kichik ilmiy xodimi Vey Ke.

Joriy yilning yozida ko‘plab mamlakatlarda rekord darajadagi yuqori haroratlar qayd etildi, bir qator hududlarda suvdan foydalanish cheklandi, konditsionerlarning ishlashi tufayli elektr energiyasi iste’moli oshdi.

Avvalroq Xitoy meteorologiya boshqarmasi Xitoyda meteorologik kuzatuvlar boshlangan vaqtdan beri iyul oyidagi rekord darajadagi  harorat Shinjon-Uyg‘ur avtonom tumanida qayd etilgani haqida xabar bergan edi: u yerda 52,2 daraja issiq kuzatilgan. 2017-yildagi rekord 1,6 darajaga yangilangan.

“Shinjonda haddan tashqari yuqori haroratning yuzaga kelishi nafaqat qisqa muddatli sinoptik vaziyat, balki uzoq muddatli iqlim isishi jarayoni bilan ham bog‘liq”, — dedi Vey Ke.

“Uzoq istiqbolga nazar tashlaydigan bo‘lsak, global isish jarayonlari rivojlanishda davom etmoqda, ichki hududda haroratning o‘sishi o‘rtacha global ko‘rsatkichdan oshib bormoqda. Bu ekstremal issiqlik chastotasi va intensivligining oshishiga olib keldi, shuningdek, joriy yilda Xitoyda va butun dunyoda tez-tez sodir bo‘ladigan ekstremal issiqlik hodisalarining asosiy sababi ham shudir”, — dedi u.