Rossiyada o‘zbekistonlik migrant 11 yashar qizni zo‘rlaganlikda gumonlanib qo‘lga olindi

Rossiyaning Leningrad viloyatida 42 yoshli O‘zbekiston fuqarosi voyaga yetmagan qizga jinsiy zo‘ravonlik qilishda gumonlanib qo‘lga olindi. Bu haqda 78.ru xabar berdi.

Ma’lum qilinishicha, hodisa yuzasidan jabrlanuvchining onasi politsiyaga murojaat qilgan. U 19-iyul kuni kechqurun noma’lum erkak 11 yoshli qiziga nisbatan jinsiy zo‘ravonlik qilganini aytgan.

Erkak izolyatorga yotqizilib, unga nisbatan ma’muriy bayonnoma tuzilgan. Hozirda hodisaning barcha holatlariga oydinlik kiritilmoqda.

Eslatib o‘tamiz, avvalroq Rossiyaning Ramenskoye shahrida o‘zbekistonlik nafaqaxo‘r 9 yashar qizga nisbatan jinsiy zo‘ravonlik qilgandi. O‘zbekiston fuqarosi 60 yoshda bo‘lib, politsiya xodimlari tomonidan qo‘lga olingan.