Rishton tumani va Marg‘ilon shahriga yangi hokimlar tayinlandi
Shukurulloxon Nisbatxonov Marg‘ilon shahar hokimi etib tayinlandi. Bu haqda matbuot xizmati xabar berdi.
Qayd etilishicha, 11-avgust kuni Xalq deputatlari Marg‘ilon shahar kengashining navbatdan tashqari sessiyasida lavozimidan ozod etilgan Adham Ziyavitdinov o‘rniga yangi shahar hokimini tayinlash bilan bog‘liq tashkiliy masala ko‘rilgan.
Viloyat hokimi Xayrullo Bozorov tomonidan taqdim etilgan Shukurulloxon Nisbatxonov nomzodi Marg‘ilon shahar deputatlari tomonidan qo‘llab-quvvatlangan.
Tayinlovga qadar u Qashqadaryo viloyati davlat soliq boshqarmasi boshlig‘i lavozimida faoliyat yuritgan.
Shuningdek, Bahodir Xoliqov Rishton tumani hokimi etib tayinlandi.
Shu paytgacha Farg‘ona viloyati Kambag‘allikni qisqartirish va bandlik bosh boshqarmasi boshlig‘ining o‘rinbosari bo‘lib ishlab kelgan Bahodir Xoliqovni Rishton tumani hokimi etib tayinlash to‘g‘risidagi viloyat hokimining qarori Xalq deputatlari Rishton tuman kengashi deputatlari tomonidan bir ovozdan maʼqullangan.
Iyul oxirida o‘z hududida ishlarni lozim darajada tashkil etmagani uchun Rishton tumani hokimi S.Soliyev, Marg‘ilon shahar hokimi A.Ziyavitdinov egallab turgan lavozimidan ozod qilingandi.
