Dog‘istonda 35 kishining hayotiga zomin bo‘lgan portlash sababi aytildi
Rossiya Tergov qo‘mitasi 35 kishining hayotiga zomin bo‘lgan Maxachqal’adagi portlash tez yonuvchi agrokimyoviy moddalarni saqlash qoidalari buzilgani sabab sodir bo‘lgan bo‘lishi mumkinligini bildirdi.
Tergov maʼlumotlariga ko‘ra, yong‘in avtoservisda boshlangan, shundan so‘ng u yonuvchi o‘g‘it saqlangan qo‘shni xonaga o‘tgan. Keyin kuchli portlash sodir bo‘lgan va alanga yaqin atrofdagi yoqilg‘i quyish shoxobchasiga tarqalgan.
“RBK” muxbiri portlash joyida qishloq xo‘jaligida o‘g‘it sifatida ishlatiladigan ammiakli selitra qoplari topilganini ma’lum qildi.
Avvalroq Mash Telegram kanali mahalliy aholiga tayanib, portlash selitra omborida yuz berganini yozgandi.
Dog‘iston rahbari Sergey Melikovning aytishicha, portlashga xavfsizlik choralariga e’tibor bermagan odamlarning “tamagirligi va ochko‘zligi” sabab bo‘lgan. Yoqilg‘i quyish shoxobchasi yaqinida xizmat ko‘rsatish stansiyasini joylashtirish mumkin emas.
Maxachqal’ada portlash: O‘zbekiston fuqarosi ham halok bo‘ldi
Maxachqal’adagi portlash 14-avgust kuni kechqurun sodir bo‘ldi. Oqibatda 35 kishi halok bo‘ldi, 80 ga yaqin odam yaralandi. Qurbonlar orasida O‘zbekiston fuqarosi ham borligi aytilmoqda.
Rossiya Tergov qo‘mitasi tomonidan ikki yoki undan ortiq kishining o‘limiga sabab bo‘lgan xavfsizlik talablariga javob bermaydigan xizmatlar ko‘rsatish moddasi bo‘yicha jinoyat ishi qo‘zg‘atilgan. Dog‘istonda motam e’lon qilindi.
