O‘zbekistonda ko‘chmas mulk tarixini onlayn tekshirish imkoniyati yaratiladi
“O‘zbekiston Respublikasi Hukumatining ayrim qarorlariga ko‘chmas mulk tarixi maʼlumotlarini taqdim etish bo‘yicha davlat xizmatini ko‘rsatishni yo‘lga qo‘yishga yo‘naltirilgan o‘zgartirish va qo‘shimchalar kiritish to‘g‘risida”gi Vazirlar Mahkamasi qarori qabul qilindi.
Hujjat bilan ko‘chmas mulk tarixi maʼlumotlarini taqdim etish bo‘yicha davlat xizmatini ko‘rsatishning maʼmuriy reglamenti tasdiqlanmoqda.
Davlat xizmatidan quyidagi usullar orqali foydalanish mumkin:
- DXMga tashrif buyurgan holda;
- YAIDXP yordamida;
- davreestr.uz. orqali.
Bunda ko‘chmas mulkning kadastr raqamini aks ettirgan holda so‘rovnoma to‘ldirib, BHMning 0,5 baravarini to‘lash lozim. Natijalar quyidagi shakldagi maʼlumotnoma tarzida 3 ish kunida taqdim etiladi.
Maʼlumotnomada:
- ko‘chmas mulkka nisbatan amaldagi va oldingi huquqlar (qurilgan yili, maydon kvadraturasidagi o‘zgartirishlar);
- davlat ro‘yxatidan o‘tkazilgan sana;
- huquqni belgilovchi hujjat turi, uni bergan organ va hujjat berilgan sana.
Hujjat Qonun hujjatlari maʼlumotlari milliy bazasida eʼlon qilingan va 15-avgustdan kuchga kirgan.
Bundan oldin Toshkent viloyatida 4 176 ta ko‘chmas mulk manzili o‘zgargani, Toshkent viloyatida prezident sovg‘asi sifatida berilgan uy boshqa shaxsga rasmiylashtirilgani, O‘zbekistonda 3 ming gektar yer o‘zboshimchalik bilan egallab olingani to‘g‘risida xabar berilgandi.
