Toshkentda o‘qituvchilarni majburiy mehnatga jalb qilgan maktab direktoriga chora ko‘rildi
Toshkentning Yashnobod tumanidagi 149-maktab o‘qituvchilari majburiy mehnatga jalb qilingani haqida xabar berilgandi. Kambag‘allikni qisqartirish va bandlik vazirligi maktab direktoriga chora ko‘rilganini ma’lum qildi.
Unga ko‘ra, Yashnobod tumani 149-maktab direktori tomonidan Vazirlar Mahkamasining 2018-yil 10-maydagi 349-sonli “O‘zbekiston Respublikasida majburiy mehnatga barham berishga doir qo‘shimcha chora-tadbirlar to‘g‘risida”gi qarori va Mehnat kodeksining 5,25-moddalari talablari buzilib, o‘qituvchilar obodonlashtirish hamda ko‘kalamzorlashtirish ishlariga jalb qilingan.
Shu sababli, tashkilot rahbariga nisbatan Ma’muriy javobgarlik to‘g‘risidagi kodeksining 51-moddasi 2-qismiga asosan ma’muriy jarima qo‘llanildi.
Pedagog xodimlarning xizmat vazifalarini bajarishiga to‘sqinlik qilganlik uchun javobgarlikni kuchaytirishni ko‘zda tutuvchi qonunga ko‘ra, pedagog xodimni mehnatga biron-bir shaklda ma’muriy tarzda majburlash uchun ma’muriy va jinoiy javobgarliklar kuchaytirilgan. Huquqbuzarlik ta’lim tashkilotining pedagog xodimiga nisbatan sodir etilgan bo‘lsa, bazaviy hisoblash miqdorining yuz baravaridan bir yuz ellik baravarigacha miqdorda jarima solishga sabab bo‘ladi.
