Tojikistonda kuchli yomg‘irlar tufayli halok bo‘lganlar soni 21 kishiga yetdi
Tojikistonda 27-avgust kuni kuzatilgan kuchli yog‘ingarchilik sel va ko‘chki kelishiga sabab bo‘ldi. Tabiiy ofat oqibatida halok bo‘lganlar soni 21 kishiga yetdi.
Dastlab 13 kishi halok bo‘lgani haqida xabar berilgandi. Yangi ma’lumotlarga ko‘ra, tabiiy ofat qurbonlari 21 kishini tashkil qilmoqda. Jumladan, Vahdat shahrida 17 kishi, Rudakiy va Varzob aholi punktlarida esa jami to‘rt kishi halok bo‘lgan. Ular orasida 40 kunlik chaqaloq ham bor.
Vahdat shahrini tiklash ishlari uchun Favqulodda vaziyatlar qo‘mitasi hisobidan 3 tonna, Hisor shahriga 2 tonna dizel yoqilg‘isi ajratilgan.
Hozirda Vahdat—Romit avtomobil yo‘li to‘liq loy va toshlardan tozalanib, harakatlanish tiklangan. Voqea joyida mahalliy favqulodda komissiyalar ishlamoqda va yetkazilgan zarar miqdori aniqlanmoqda.
