Samarqandda tug‘ilgan Rustem Umerov Ukraina mudofaa vaziri bo‘ladi

Aleksiy Reznikov Ukraina mudofaa vaziri lavozimini tark etadi. Bu haqda Ukraina prezidenti Vladimir Zelenskiy 3-sentabr kuni kechki murojaatida aytib o‘tdi.

Zelenskiy Reznikovning o‘rniga mudofaa vaziri lavozimiga hozirda Ukraina Davlat mulki jamg‘armasiga rahbarlik qilayotgan Rustem Umerovni tayinlashni taklif qildi.

“Men Ukraina mudofaa vazirini almashtirishga qaror qildim. Aleksey Reznikov 550 kundan ortiq keng ko‘lamli urushni boshdan kechirdi. Men vazirlikka yangi yondashuvlar, shuningdek, harbiylar va umuman jamiyat bilan o‘zaro munosabatlarning boshqa shakllari kerak, deb hisoblayman. Hozir vazirlikka Rustem Umerov rahbarlik qilishi kerak. Men parlamentdan bu nomzodni qo‘llab-quvvatlashini kutaman”, — dedi Zelenskiy.

Rustem Umerov – kelib chiqishi musulmon qrim-tatar bo‘lgan ukrainalik tadbirkor. Uning oilasi 1944-yilda Qrimdan Markaziy Osiyoga ko‘chirib yuborilgan. Umerov 1982-yil Samarqand viloyatining Bulung‘ur tumanida tug‘ilgan. 1980-yillar oxirida qrim-tatarlarni vataniga qaytarish boshlanganida, Umerovlar oilasi Qrimga qaytishga muvaffaq bo‘lgan.

U “Qrim tatarlari jamiyati” jamoat tashkilotining asoschilaridan biri, shuningdek, qrim-tatar xalqi yetakchisi Mustafo Jemilevning maslahatchisi bo‘lgan. 2019-yilda Umerov Oliy Rada deputati bo‘ldi. U 2022-yildan beri Ukraina Davlat mulki jamg‘armasini boshqarib keladi.

Aleksiy Reznikov 2021-yil noyabridan beri Ukraina Mudofaa vazirligini boshqarib kelayotgan edi. Reznikovning iste’foga chiqishi haqidagi ma’lumotlar birinchi marta 2023-yil boshida Ukrainada korrupsiya mojarolari tufayli bir necha yuqori martabali amaldorlar, jumladan, mudofaa vaziri o‘rinbosarlari ishdan bo‘shatilishi ortidan paydo bo‘ldi.

Ukraina mudofaa vazirining almashtirilishi haqidagi boshqa xabarlar 2023-yil avgustida tarqaldi.