Janubiy Koreyada o‘zbekistonliklarning 148 ming dollar puli undirib berildi
Tashqi mehnat migratsiyasi agentligi yordamida Janubiy Koreyadagi O‘zbekiston fuqarolarining 148 ming dollar pullari undirib berildi.
Qayd etilishicha, agentlikning Janubiy Koreyadagi vakolatxonasi vakillari tomonidan 2023-yilning avgust oyida 7 nafar O‘zbekiston fuqarosining murojaatlari asosida 40 million 149 ming 589 koreys voni (30,3 ming dollar) oylik ish haqi va sug‘urta mablag‘larini olishda amaliy yordam ko‘rsatilgan.
Yil davomida esa vakolatxona tomonidan yuridik tashkilotlar bilan hamkorlikda Janubiy Koreyada vaqtincha mehnat faoliyatini amalga oshirayotgan o‘zbekistonliklarning jami 148 ming dollar miqdoridagi sug‘urta, kompensatsiya hamda oylik ish haqi mablag‘lari undirib berilishiga ko‘maklashilgan.
Bundan oldin Rossiyada ishlayotgan o‘zbekistonliklarning 36 million so‘m ish haqi, Qozog‘istonda 32 nafar O‘zbekiston fuqarosining 15 million tenge miqdoridagi ish haqi undirilgani to‘g‘risida xabar berilgandi.
