Kim Chen In va qizi KXDR tashkil topganining 75 yilligiga bag‘ishlangan harbiy paradda ishtirok etdi (foto)
Koreya xalq demokratik respublikasi(KXDR)da mamlakat tashkil topganining 75 yilligi sharafiga fuqaro mudofaa kuchlari paradi bo‘lib o‘tdi, unda Shimoliy Koreya rahbari Kim Chen In, uning qizi Kim Chju E ishtirok etdi, deb xabar bermoqda Koreya markaziy telegraf agentligi (KCNA).
1948-yil 9-sentabrda KXDR davlatiga asos solingani e’lon qilingan, bu sana har yili Koreya yarimorolining shimolida davlat bayrami sifatida nishonlanadi.
“8-sentabr kuni Pxenyan shahridagi Kim Ir Sen maydonida KXDR tashkil etilganining 75 yilligiga bag‘ishlangan tantanali Qurolli fuqaro mudofaasi kuchlarining harbiy paradi bo‘lib o‘tdi... Harbiy paradda hurmatli o‘rtoq Kim Chen In hozir bo‘ldi”, — deyiladi xabarda.
Tantanali tadbirlarda ishtirok etish uchun KXDRga tashrif buyurgan XXR partiya-hukumat delegatsiyasi a’zolari, Rossiya va Xitoy diplomatlari taklif etilgan.
Agentlik xabariga ko‘ra, osmonda “75” raqamini hosil qiluvchi samolyotlar saf tortgan, harbiy orkestr chiqish qilgan, KXDR davlat bayrog‘ini ko‘tarishga bag‘ishlangan tantanalar o‘tkazilgan. Parad yakunida mushaklar otilib, tadbir ishtirokchilari “Manse!” (“Ura”) deb hayqirgan.
Avvalroq Kim Chen In Shimoliy Koreyaning taktik yadro quroli bilan jihozlangan yangi suvosti kemasini suvga tushirish marosimida qatnashgandi. KXDR barcha og‘ir suvosti kemalarini modernizatsiya qilish va ularni taktik yadro qurollari bilan jihozlashni rejalashtirmoqda.