O‘zbekiston oltin-valyuta zaxirasi ketma-ket beshinchi oy kamaydi
O‘zbekistonning rasmiy zaxira aktivlari avgust oyida 958 million dollarga kamayib, 2023-yil 1-sentabr holatiga ko‘ra, 32 milliard 690 million dollarni tashkil etmoqda. Bu haqda Markaziy bank xabar berdi.
Zaxiralar ketma-ket beshinchi oy kamaymoqda — mayda rasmiy zaxira aktivlari 837,9 million dollarga, iyunda — 649 million dollar, avgustda esa 71,8 million dollarga kamaygandi.
Ma’lum qilinishicha, mamlakatdagi oltin zaxirasi 410 million dollarga ko‘payib, 23 milliard 430 million dollarni tashkil etmoqda. Qimmatbaho metallning hajmi ham 0,3 million troy unsiyaga (9,33 tonna) ko‘payib, 12,1 million troy unsiyasini (taxminan 376,31 tonna) tashkil etdi.
O‘zbekiston o‘tgan yanvar–aprel oylarida 3 milliard dollardan ortiq oltin eksport qilgan. Aprel oyida O‘zbekiston oltin eksportini 650 million dollargacha qisqartirdi. Xorijga qimmatbaho metall yetkazib berishning umumiy hajmi 3,06 milliard dollarni tashkil etdi.
Oltin zaxiralari nima uchun kerak?
Oddiy til bilan aytganda, bu sug‘urta, davlatning “xavfsizlik yostig‘i”. Zaxiralar dunyoning deyarli barcha mamlakatlarida favqulodda vaziyatlar uchun mavjud.
Zaxiralar, odatda, yuqori likvidli, ya’ni tez sotiladigan aktivlarda saqlanadi. Oltin va xorijiy valyuta ushbu talablarga javob beradi — ulardan istalgan vaqtda qarz to‘lash yoki investitsiyalar uchun foydalanish mumkin.
2017-yilgacha O‘zbekiston zaxiralari to‘g‘risidagi ma’lumotlar jamoatchilikka e’lon qilinmas edi. O‘sha yilning noyabr oyida zaxiralar 26 milliardni tashkil etishi ma’lum bo‘lgan.
