AQSH generallari qo‘shma mashg‘ulotlar uchun Armanistonga keldi
AQSHning 10-tog‘ diviziyasi qo‘mondoni general-mayor Gregori Anderson va armiya shtab boshlig‘ining Yevropa va Afrikadagi o‘rinbosari, brigada generali Patrik Elis Eagle Partner 2023 qo‘shma mashg‘ulotlarida ishtirok etish uchun Armanistonga keldi. Bu haqda Amerikaning Yerevandagi elchixonasi xabar berdi.
Bayonotda aytilishicha, generallar AQSHning Armanistondagi elchisi Kristina Kvinn bilan birgalikda “Zar” poligonidagi mashg‘ulotlarning borishini kuzatib boradi.
Eagle Partner tinchlikparvar mashg‘ulotlari Armanistonda 11—20-sentabr kunlari bo‘lib o‘tmoqda. Ularda 85 nafar amerikalik va 175 nafar arman harbiylari ishtirok etmoqda. Armaniston Mudofaa vazirligi mashg‘ulotlar maqsadini “tinchlikni saqlash vazifalarini bajarish chog‘ida nizolashayotgan tomonlar o‘rtasidagi munosabatlarni barqarorlashtirish operatsiyasi” deb atagan.
Shuningdek, mashg‘ulotlarda NATOning “Tinchlik yo‘lida hamkorlik” dasturi doirasida arman qo‘shinlari tayyorgarligini oshirish rejalashtirilgan.
“Tinchlik yo‘lida hamkorlik” — NATO va alyansga aʼzo bo‘lmagan alohida hamkor davlat o‘rtasidagi ikki tomonlama hamkorlik dasturidir. Armaniston unda 1994-yildan beri qatnashib keladi.
