Suriyadagi jangovar harakatlarda qatnashib kelayotgan o‘zbekistonlik erkak qidirilmoqda
Suriyadagi jangovar harakatlarda qatnashib kelayotgan o‘zbekistonlik erkakka qidiruv eʼlon qilindi. Bu haqda Toshkent viloyati IIBB axborot xizmati xabar berdi.
Unga ko‘ra, Toshkent viloyati Yangiyo‘l tumanida 1991-yilda tug‘ilgan V.H. 2017-yil ishlash maqsadida Turkiyaning Istanbul shahriga ketgan. Ijtimoiy tarmoqlar orqali diniy ekstremistik va terroristik g‘oyalarni targ‘ib qiluvchi video va audiolar taʼsiriga tushish natijasida 2018-yilda jihod qilish va Suriyadagi janglarda ishtirok etish maqsadida “Tavhid va jihod katibasi” xalqaro terroristik tashkilot safiga borib qo‘shilib, tashkilot aʼzosiga aylangan va u yerda jangovar harakatlarda qatnashib kelmoqda.
Hozirda huquqni muhofaza qiluvchi organlar tomonidan unga nisbatan Jinoyat kodeksining 244-moddasi 3-qismi “g” bandi, 155-moddasi va 159-moddasi bilan jinoyat ishi qo‘zg‘atilib, qidiruv eʼlon qilingan.
Bundan avval xalqaro terrorchilik tashkiloti saflariga qo‘shilgan o‘zbekistonlik erkak va uning o‘g‘li qidiruvga berilgani xabar qilingandi. Shuningdek, qizlari bilan xalqaro terrorchilik tashkiloti jangarilari aʼzosi bo‘lgan o‘zbekistonlik ayol ham qidirilmoqda. Ushbu ayol ham Rossiyada yashovchi erkak bilan tanishib, ikki qizi bilan dastlab Ozarbayjon orqali Turkiyaga, u yerdan esa Suriyaga borgan va xalqaro terrorchilik tashkilotining jangarilariga borib qo‘shilgan.
