Farg‘onada to‘y kortejida yo‘lni to‘sib harakatlangan 16 nafar yigit 15 sutkaga qamaldi (video)
Farg‘ona viloyatining Yozyovon tumanida to‘y korteji uyushtirib, qoidabuzarlik sodir qilgan bir guruh yigitlar javobgarlikka tortildi. Bu haqda viloyati IIB matbuot xizmati xabar berdi.
Qayd etilishicha, ular to‘y korteji uyushtirib, boshqa transport vositalarining erkin harakatlanishiga halal bergan va jamoat joylarida yurish-turish qoidalarini buzgan. Holat aks etgan video ijtimoiy tarmoqlarda tarqalgan.
Shu kuning o‘zida huquqbuzarlar shaxsiga aniqlik kiritilib, avtomobillar vaqtincha jarima maydoniga qo‘yilgan.
To‘plangan hujjatlar sayyor sud tartibida ko‘rib chiqilgan. Sud jami 16 nafar yigitning har biriga 15 sutkadan ma’muriy qamoq jazosi tayinlagan. Ular qilmishidan pushaymonligini bildirgan.
Samarqand viloyati IIB matbuot xizmatining ma’lum qilishicha, viloyatning Kattaqo‘rg‘on shahrida ham shunday huquqbuzarlik sodir etilgan va haydovchilarga nisbatan tegishli choralar ko‘rilgan.
