Bayden Ukrainaga ATACMS raketalarini yetkazib berish haqidagi savolga javob berdi
AQSH prezidenti Jo Bayden Ukraina prezidenti Vladimir Zelenskiy bilan uchrashuvda Ukraina tomoni so‘ragan hamma narsani “o‘rganib chiqqanini” aytdi. Bayden bu haqda jurnalistlarning u Ukrainaga ATACMS raketalarini yetkazib berishni va’da qilgan-qilmagani haqidagi savolga javoban aytdi.
“Men Zelenskiy bilan gaplashdim va biz u so‘ragan hamma narsani batafsil o‘rganib chiqdik”, — dedi Bayden Oq uy matbuot xizmati tomonidan efirga uzatilgan nutqida.
Biden: "I have spoken with Zelensky and everything he’s asked for, we’ve worked out” pic.twitter.com/DXPrgZQSN7
— The Post Millennial (@TPostMillennial) October 4, 2023
Jurnalistlar bilan o‘tgan uchrashuvda Jo Bayden Ukrainani moliyaviy qo‘llab-quvvatlash haqida katta nutq so‘zlash rejasini e’lon qildi.
2022-yildan beri Ukraina rasmiylari AQSHdan 300 kilometrgacha masofaga uchuvchi ATACMS uzoq masofali raketalarini Ukraina harbiylariga topshirishni so‘ramoqda. 2023-yil sentyabrda Bayden va Zelenskiy o‘rtasidagi uchrashuvdan so‘ng Amerika OAV AQSH prezidenti Ukrainaga kassetali o‘q-dorilar bilan bir qator ATACMS raketalarini yetkazib berishga qaror qilgani, biroq bu haqda ommaga e’lon qilmayotgani haqida xabar berdi. 3-oktyabr kuni AQSH armiyasi Bayden ma’qullagan zahoti ATACMS’larni Ukrainaga yuborishga tayyorligini bildirdi.
O‘tgan hafta AQSH Kongressi Ukrainaga harbiy yordam uchun sarflanadigan xarajatlarni o‘z ichiga olmaydigan vaqtinchalik budjetni qabul qildi, natijada AQSH hukumati xodimlarining ishi davom etadigan bo‘ldi. Jo Bayden va Senat a’zolari Ukrainaga harbiy yordam berishda davom etishga ishontirishdi.
