Hasanboy Do‘stmatovning prof boksdagi navbatdagi jangi sanasi va raqibi tasdiqlandi 

O‘zbekistonlik bokschi Hasanboy Do‘stmatovning navbatdagi jangi sanasi va raqibini nomi aniq bo‘ldi.

Xanchjou shahrida o‘tkazilgan Osiyo o‘yinlarida chempionlik shohsupasiga ko‘tarilgan Do‘stmatov 5-noyabr kuni Rossiyaning Sochi shahrida tashkil etiladigan boks oqshomida Janubiy Afrika Respublikasi vakili Sifamandla Baleniga qarshi ringga ko‘tariladi. Ushbu jang oqshomning markaziy to‘qnashuvi sifatida qayd etilgan. 

Ma’lumot uchun Baleni faoliyati davomida 21 ta g‘alaba (8 nokaut), 5 mag‘lubiyat va 2 ta durang natija qayd etgan. Bokschi joriy yilning 4-sentabr kuni IBO World Minimum kamari uchun o‘tkazgan 12 raundlik jangida Mzamo Maxifeniga ochkolar hisobiga ko‘ra yutqazib qo‘ygan.

Hasanboy esa prof boksdagi 5 ta jangining barchasida g‘alaba qozongan.