Isroil va HAMAS o‘rtasidagi urushda 5 nafar o‘zbekistonlik halok bo‘lgani aytildi
O‘zbekiston ommaviy axborot vositalari va ijtimoiy tarmoqlarda Isroil—HAMAS qarama-qarshiligini yoritish jarayonida O‘zbekiston fuqarolari halok bo‘lgani haqida maʼlumotlar eʼlon qilinmoqda. Mamlakatning Isroildagi elchixonasi mazkur xabarga tushuntirish berdi.
Maʼlum qilinishicha, Isroil Tashqi ishlar vazirligi va politsiyasi bergan maʼlumotga ko‘ra, mamlakat janubida ro‘y bergan hujum vaqtida O‘zbekistonda tug‘ilgan va 90-yillarda repatriatsiya dasturiga muvofiq Isroilga ko‘chib kelgan 5 (besh) nafar kishi halok bo‘lgan. Olingan maʼlumotlarga ko‘ra, ular amaldagi O‘zbekiston fuqarolik pasportlariga ega emas.
“OAVni kuzatib boruvchi fuqarolarda bo‘lib o‘tayotgan voqealar ko‘lami va urush harakatlari haqida noto‘g‘ri qarashlar paydo bo‘lishining oldini olish maqsadida maʼlumotlarni chop etishdan oldin ularni ishonchli manbalardan, shu jumladan, O‘zbekiston Respublikasining Isroildagi elchixonasi orqali qayta tekshirishingizni so‘raymiz”, — deyiladi elchixona xabarida.
