O‘zbekistonda soliq organlari tadbirkorlar hisobotlarining bir qismini shakllantirib beradi
“Soliq organlari tomonidan ayrim soliq hisobotlarini shakllantirish tartibi joriy etilganligi munosabati bilan O‘zbekiston Respublikasi hukumatining ayrim qarorlariga o‘zgartirish va qo‘shimchalar kiritish” haqidagi Vazirlar Mahkamasi qarori qabul qilindi.
Hujjat bilan soliq organlarining ayrim soliq hisobotlarini shakllantirishi to‘g‘risidagi qaror tasdiqlandi. Bu Soliq kodeksining 81-moddasida nazarda tutilgan.
2024-yil 1-yanvardan soliq organlari tadbirkorlarning istagiga ko‘ra, yuridik shaxslarning qo‘shilgan qiymat solig‘i (QQS), aylanma solig‘i, mol-mulk solig‘i va yer solig‘i bo‘yicha hisobotlarni shakllantirishi mumkin bo‘ladi.
Hujjatlar avtomatik tarzda tayyorlanadi. Hisobotlarni tayyorlash uchun ichki manbalar (soliq to‘lovchining soliq va moliyaviy hisobotlari, elektron hisob-fakturalar, onlayn nazorat-kassa mashinalari, onlayn cheklar va boshqalar) maʼlumotlari bilan bir qatorda tashqi manbalardan (boshqa davlat organlari tizimlari) ham foydalaniladi.
Hisobot soliq to‘lovchining shaxsiy kabinetida aks etadi. U yoki uning vakolatli vakili tuzilgan hisobotning to‘g‘riligi va to‘liqligini tasdiqlashi yoki hujjatni qayta rasmiylashtirib, soliq organlariga taqdim etishi kerak bo‘ladi.
2022-yilda bu amaliyot tajriba tariqasida Xorazm viloyatida sinab ko‘rilgan. Bundan tashqari, savdo kvitansiyalarini berishda texnik xatolarni tuzatish muddati belgilangan. Agar bunga qadar tuzatishni keyingi oyning 10-kunidan kechiktirmasdan kiritish mumkin bo‘lsa, 20-oktyabrdan boshlab hisobot davrining oxirigacha vaqt ajratiladi.
Avvalroq O‘zbekistonda soliqqa oid huquqbuzarliklar uchun moliyaviy sanksiyalar faqat sud tomonidan qo‘llanilishi to‘g‘risida xabar berilgandi.
