Toshkent jamoat transportida 1-noyabrdan rag‘batlantiruvchi tariflar joriy etiladi
Toshkent shahrida jamoat transportlarida yo‘l haqi 1-noyabrdan yangicha tarif asosida hisoblanadi. Bu haqda “Toshshahartransxizmat” xabar berdi.
Qayd etilishicha, poytaxt jamoat transportida yangi, qo‘shimcha va rag‘batlantiruvchi tariflar joriy etilmoqda. Unga ko‘ra, bir yo‘lovchi qatnovi uchun cheklangan tariflar naqd pul va bank kartalarti orqali 2000 so‘m, ATTO transport kartalari orqali to‘lov uchun esa 1700 so‘m etib belgilanmoqda.
Yo‘lovchilar ATTO transport kartalaridan foydalangan holda bir soat ichida ikkinchi marotaba avtobusdan foydalansalar yo‘l haqi uchun 700 so‘m to‘laydi. Bir soat davomida yo‘lovchilar avtobusdan uchinchi va to‘rtinchi marotaba maʼlum bir manzilga harakatlanishi esa mutlaqo bepul bo‘ladi.
May oyi oxiriga qadar Toshkent jamoat transporti yo‘lovchilari uchun yangicha narxlarni o‘z ichiga olgan qulay tariflar joriy etilishi haqida xabar berilgandi. Iyun oyida shahar kengashi deputati Xusniddin Ergashev o‘zgarish keyinga — kamida shu yilning kuz oylariga qoldirilganini ma’lum qildi.
