Humo kartasi bankomatlari o‘chirilishi haqidagi xabarlar rad etildi

Ijtimoiy tarmoqlarda Humo kartasi bankomatlari o‘chirilishi, kartadagi pullarni tezda boshqa kartalarga o‘tkazib olish kerakligi haqida xabarlar tarqaldi. Kompaniya bu xabarlarni rad etdi.

“Ushbu xabarlar yolg‘on bo‘lib, hozirda Humo to‘lov tizimining barcha bankomatlari to‘liq ishchi holatda ekanligini maʼlum qilamiz”, — deyiladi raddiyada.

Kompaniya aholi o‘rtasida yolg‘on axborot tarqatganlik uchun javobgarlik borligini eslatib, ijtimoiy tarmoq faollaridan tekshirilmagan va yolg‘on maʼlumotlarni tarqatmasliklarini so‘radi.

Bundan bir kun avval Humo bankomatlari naqd pul bermayapti, mazmunidagi xabarlar tarqalgandi. Kompaniya pul yechish amaliyotlari monitoringi natijasida ayrim bankomatlarda naqd pul bermaslik holatlari kuzatilgani sabab, ushbu holatni bartaraf etish uchun bankomatlar rejali profilaktika maqsadida vaqtinchalik o‘chirib turilishi mumkinligini ma’lum qilgandi.