Soliq qo‘mitasi Yandex Taxi O‘zbekiston hududida soliq rezidenti sifatida xizmat ko‘rsatishni boshlaganini ma’lum qildi
Yandex.Go xizmati 1-dekabrdan boshlab O‘zbekiston hududida soliq rezidenti – “YandeksGo UB” MCHJ yuridik shaxs tomonidan taqdim etiladi, deb xabar bermoqda Soliq qo‘mitasi matbuot xizmati.
Qayd etilishicha, shu kundan boshlab Yandex.Go xizmati o‘z hisob-kitoblarini O‘zbekiston qonunchiligi talablari asosida yuritadi, birlamchi hujjatlarni va soliq hisobotlarini taqdim etadi hamda belgilangan soliqlarni to‘laydi. Bu haqda Ridetech International B.V. Soliq qo‘mitasini rasmiy xat orqali xabardor qilgan.
Shu bilan birga, Yandex.Go xizmatini fiskal ma’lumotlar operatori bilan integratsiyalash bo‘yicha ishlar yakunlangan. O‘zini o‘zi band qilgan shaxslar va yuridik shaxslar mazkur servis yordamida tashish xizmatini ko‘rsatganda mijozlarga fiskal chek berish masalasi ko‘rib chiqilmoqda.
Shu tariqa, Yandex Go o‘z faoliyatini qonun hujjatlariga muvofiqlashtirish bo‘yicha Soliq qo‘mitasi tomonidan qo‘yilgan talablarni bajarmoqda. Shuningdek, MyTaxi va Uklon xizmatlarining fiskal maʼlumotlar operatori bilan integratsiyalash ishlari ham yakunlanganini maʼlum qilamiz. Yaqin kunlarda ular orqali ko‘rsatilgan tashish xizmatlari uchun to‘lovlarni fiskallashtirish kutilmoqda, — deyiladi xabarda.
