Argentinaning yangi prezidenti “shok” islohotlar dasturini taqdim etmoqchi
Noyabr oyida Argentinada bo‘lib o‘tgan prezidentlik saylovlarida g‘alaba qozongan Xaver Miley “shok” islohotlar paketini taqdim etmoqchi, deb xabar berdi Bloomberg Argentinaning La Nacion gazetasi nashriga tayanib.
Nashr manbalari hujjat “yangi ijtimoiy shartnoma” bo‘lishini aytdi. U nafaqat yangi maʼmuriyat davridagi hukumat tuzilmasini belgilovchi “vazirlik qonuni” standarti, balki siyosiy va iqtisodiy xarakterdagi boshqa choralarni ham o‘z ichiga oladi.
Ular orasida quyidagilar bor:
- vazirliklar sonini hozirgi 18 tadan sakkiz yoki to‘qqiztaga qisqartirish, shuningdek, ular tarkibidagi quyi tuzilmalarni tugatish;
- tog‘-kon va neft sohalarida iqtisodiy qonunchilik regulyatsiyasini bekor qilish (bu investitsiyalarni rag‘batlantirish uchun zarur, dedi La Nacion manbasi);
- soliq tizimini soddalashtirish;
- mehnat sohasidagi o‘zgarishlar (masalan, ish beruvchilar uchun jarimalar tizimini kamaytirish va kompensatsiyani ishsizlik fondi bilan almashtirish);
- davlat korxonalarini xususiylashtirish yoki ularning ulushlarini xodimlarga berish;
- partiyalarni moliyalashtirish va praymerizlarga ta’sir qiladigan “siyosiy islohotlar”.
Muxolifatchi Miley prezidentlik saylovlarining ikkinchi bosqichida g‘alaba qozongandi. U 56 foiz, uning raqibi, o‘sha paytdagi hukmron koalitsiya nomzodi va iqtisodiyot vaziri Serhio Massa 44 foiz ovoz to‘pladi. Miley 10-dekabrda prezident lavozimiga kirishadi.
Siyosatchi o‘zini “anarxo-kapitalist” deb ta’riflaydi: saylovoldi kampaniyasi davomida u so‘nggi o‘n yil ichida oltinchi turg‘unlik arafasida turgan va 143 foiz inflyatsiyadan aziyat chekayotgan Argentina iqtisodiyotini yaxshilash bo‘yicha radikal va’dalar berdi. Xususan, u mamlakat Markaziy bankini tugatish va milliy valyuta – pesodan voz kechib, uni Amerika dollariga almashtirishni taklif qildi.
