La Liga. “Barselona” turning markaziy o‘yinida “Atletiko”dan ustun keldi
Futbol bo‘yicha Ispaniya La Ligasining 15-turida “Barselona” 3-dekabr, yakshanba kuni “Atletiko”ga qarshi bahs olib bordi.
Uchrashuvning 28-daqiqasida Joau Feliks sobiq jamoasi darvozasini ishg‘ol qildi. Birinchi bo‘limning qolgan daqiqalarida “Atletiko”ning uch futbolchisi sariq kartochka olganidan boshqa yorqinroq vaziyatlar bo‘lmadi.
Ikkinchi bo‘lim ham birinchisidek asabiy holda davom etdi. O‘yinning so‘nggi 10 daqiqasi “matraschilar”ning dominantligi ostida o‘tdi. Hatto, bir vaziyatda Grizmanning jarimadan tepgan to‘pi o‘z hududida bo‘lgan de Yongning qo‘liga tegdi. Biroq, hakam qo‘l tanaga yopishib turganini hisobga olib, penalti bermadi. Qolgan daqiqalarda darvozalar ishg‘ol etilmadi va o‘yin “ko‘k-anorranglilar”ning kichik hisobdagi g‘alabasi bilan yakunlandi.
“Barselona” ushbu g‘alabadan so‘ng ochkolari sonini 34 taga yetkazdi va 3-o‘ringa ko‘tarilib oldi. Mag‘lubiyatga uchragan madridliklar 31 ochko bilan 4-o‘ringa tushdi.
La Liga
15-tur bahsi
3-dekabr, yakshanba
“Barselona” – “Atletiko” 1:0
Gol: 1:0 – 28 Joau Feliks.
“Barselona”: Penya, Kunde, Kristensen, Arauxo, Joau Kanselu, Gundo‘g‘an, de Yong, Pedri, Rafinya (Yamal, 77), Joau Feliks (Ferran Torres, 77), Levandovski.
“Atletiko”: Oblak, Molina (Aspilikueta, 46), Ximenes (Lino, 46), Ermoso, Vitsel, Rikelme (Korrea, 46), Koke (Saul, 66), De Pol, Lyorente, Grizmann, Morata (Depay, 65).
Ogohlantirishlar: Ximenes (31), Vitsel (34), Koke (38), Aspilikueta (47), Joau Feliks (50), Ferran Torres (78), Arauxo (79), Xavi (82), Joau Kanselu (87).
