Qozog‘istonda sovuq tufayli g‘ayrioddiy tabiat hodisasi kuzatildi (foto)
Ostona aholisi poytaxt osmonida g‘ayrioddiy hodisa — quyosh galosini (yorug‘lik nurlari sinishi oqibatida yuz beradigan hodisa) payqadi. Bu haqda Tengrinews xabar berdi.
8-dekabr kuni Ostonada sovuq, tiniq havo saqlanib, sekundiga 2-7 metr tezlikda shamol esmoqda. Ostonaliklar kunduzi quyosh galosi — quyosh atrofida halqasimon nurni payqagan. Bu hodisa yorug‘likning Yer atmosferasidagi mayda muz kristallari tomonidan tarqalishi natijasida yuzaga keladi. Atmosferada muz kristallaridan iborat baland bulutlar mavjud bo‘lsa, quyosh atrofidagi galoni ko‘rish mumkin.
Quyosh galosining shakllanishi uchun muz kristallarini o‘z ichiga olgan bulutlar zarur. Kristallar havoda qolishi uchun yetarlicha kichik va yengil bo‘lishi kerak. Odatda bular atmosferaning sovuq baland qatlamlarida nam tomchilar muzlaganda hosil bo‘ladigan muz kristallaridir.
