Sirdaryo va Guliston tumanlarida ombor mas’ullari salkam 310 tonna ko‘mirni talon-toroj qilgani aniqlandi
Sirdaryo va Guliston tumanlarida aholiga imtiyozli narxlarda sotish uchun ajratilgan ko‘mirni talon-toroj qilish holatlari aniqlandi, deb xabar beradi Bosh prokuratura huzuridagi departament.
Ma’lum qilinishicha, departamentning Sirdaryo va Guliston tumani bo‘limlari tomonidan o‘tkazilgan tergovga qadar tekshiruvlarda “Ko‘mir taʼminot” MCHJning “Baxt” va “Boyovut” ko‘mir ombori masʼul shaxslari va boshqalar ushbu tumanlardagi 114 nafar fuqaro nomidan arzon narxlarda ko‘mir olgani to‘g‘risidagi soxta hujjatlarni rasmiylashtirib, jami 309,9 tonna ko‘mirni o‘zlashtirish yo‘li bilan talon-toroj qilgani aniqlangan.
Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Buxoro shahri “Abu Ali ibn Sino” MFY hokim yordamchisi kredit mablag‘larini o‘zlashtirganlikda ayblanib, jinoyat ishi qo‘zg‘atilgani, Yangiyo‘l tumani hokimi mahallalardagi 6 nafar yordamchisini jazolagani to‘g‘risida xabar berilgandi.
