O‘zbekistonda turizm obyektlariga olib boruvchi yo‘llar infratuzilmasiga qo‘shimcha 200 mlrd so‘m ajratiladi

Mamlakatga sayyohlar oqimini yanada oshirish uchun mehmonxona va mehmon uylarini ko‘paytirish lozimligi ta’kidlandi, deb xabar bermoqda Prezident matbuot xizmati.

Bu borada Parkentdagi “Kumushkon”, “Hisarak”, “So‘qoq”, “Boshqizilsoy”, “Changi”, “Zarkent”, “Boyqozon” mahallalarida turizm maskani tashkil etiladi. Xonobod shahri, Boysun, Baxmal, Forish, Angren va Ohangaronda ham turizm maskanlari master rejasini tayyorlash topshirildi.

Omonxona, Maydanak kabi turistik obyektlar infratuzilmasini yaxshilashga 30 million dollar yo‘naltirish, turizm obyektlariga olib boruvchi yo‘llar infratuzilmasiga qo‘shimcha 200 milliard so‘m ajratish qaror qilindi.

Yo‘llarni ta’mirlash bilan birga, ular atrofida kompleks xizmatlarni rivojlantirishda yangicha yondashuv bo‘ladi. Turizm obyektiga olib boradigan qaysi yo‘l ta’mirlanayotgan bo‘lsa, o‘sha yo‘l bo‘yida savdo va servis shoxobchalarini joylashtirish bo‘yicha master rejalari ishlab chiqiladi va tadbirkorlarga beriladi, aholi va turistlar uchun qulay marshrutlar ishlab chiqilib, jamoat transporti yo‘lga qo‘yiladi, xostel va mehmon uylari tashkil qilinadi.