Samarqandda bank xodimi 631 mln so‘mni o‘zlashtirib, qimorda yutqazib qo‘ydi
Samarqandda 631 million so‘mni o‘zlashtirib, qimorda yutqazib qo‘ygan “Xalq banki” filiali xodimi jazolandi. Bu haqda O‘zA xabar berdi.
Ma’lum qilinishicha, Davlat xavfsizlik xizmati Samarqand viloyati boshqarmasi hamda viloyat IIB xodimlari hamkorligida davlat mulkini talon-toroj qilish va korrupsiya bilan bog‘liq holatlarning oldini olish, bu illatlarga qarshi kurashish yo‘nalishida bir qator tezkor tadbirlar o‘tkazildi.
Shunday tadbirlarning birida “Xalq banki” Samarqand filialida chakana bo‘lim boshlig‘i lavozimida ishlagan Sh.Yu. ushlangan. 1987-yilda Qashqadaryo viloyatida tug‘ilgan ushbu fuqaro mansab vakolatidan foydalangan holda o‘zining nomidagi bank plastik kartasiga noqonuniy ravishda 631 million so‘m kirim qilib, ushbu mablag‘ning barchasini onlayn qimor o‘yiniga tikib, yutqazib qo‘ygan.
Ushbu holat yuzasidan Sh.Yu.ga nisbatan Jinoyat kodeksining tegishli moddalari bilan 5 yil ozodlikdan mahrum qilish va 2 yil bank sohalarida moddiy va mansabdorlik vazifalarida ishlash huquqidan mahrum qilish jazosi tayinlangan.
