Suriya shimoli-sharqidagi AQSH harbiy bazasi raketa zarbalariga uchradi
Suriyaning Xasaka viloyati janubidagi ash-Shaddodiydagi AQSH harbiy bazasi raketa hujumiga uchradi. Bu haqda Al Mayadeen telekanali xabar berdi.
Unga ko‘ra, Amerika harbiy obyektida bir necha portlash ovozlari eshitilgan. Yetkazilgan zarar va yo‘qotishlar haqida ma’lumot berilmagan.
16-dekabr kuni AQSHning Suriyadagi uchta harbiy bazasi raketalardan o‘qqa tutilgandi. “Iroq Islomiy Qarshiligi” harakati mazkur hujumlarning ikkitasini uyushtirganini ma’lum qilgan.
30-noyabr kuni “Iroq Islomiy Qarshiligi” harakati o‘zining Telegram-kanallarida eʼlon qilgan bayonotda “Suriya va Iroqdagi qurolli amaliyotlar sonini ko‘paytirishini aytib, AQSHni ogohlantirgandi. “Chunki Amerika Isroil armiyasiga harbiy yordam ko‘rsatishda davom etmoqda. G‘azo sektori va Janubiy Livanda tinch aholini o‘ldirmoqda”, — deyilgandi o‘sha bayonotda.
