Toshkentdan Termizga uchgan reys chang bo‘roni tufayli Qarshiga qo‘ndi
Silk Avia aviakompaniyasining USA-751 reysi Termiz aeroportidagi noqulay ob-havo sharoiti (chang bo‘roni) tufayli Qarshi aerodromiga yo‘naltirildi. Bu haqda Uzbekistan Airports matbuot xizmati xabar berdi.
Ma’lum qilinishicha, Toshkent—Termiz yo‘nalishi bo‘yicha parvoz qilgan reys ekipaji Termizdagi noqulay ob-havo sharoiti sabab Qarshidagi muqobil aerodromga yo‘l olishga qaror qilgan.
Samolyot Qarshi aeroportiga mahalliy vaqt bilan soat 10:51 da qo‘ngan. Yoqilg‘i to‘ldirilganidan so‘ng samolyot Termiz aeroportiga uchib ketgan.
Eslatib o‘tamiz, 24-dekabr kuni kuchli chang bo‘roni sababli Buxoro aeroportida samolyotlarni qabul qilish cheklangandi. Shuningdek, Toshkent–Jidda yo‘nalishidagi parvoz 7 soatdan ko‘proqqa kechiktirilgani, Farg‘ona vodiysidagi ob-havo sharoiti tufayli qator reyslar Toshkentga ko‘chirilgani to‘g‘risida xabar berilgan edi.
