Emmanuel Peti: “Real”da Bellinghem bor, Mbappe u yerga o‘tsa, klub tarixidagi navbatdagi futbolchi bo‘ladi, xolos
Fransiya terma jamoasining sobiq futbolchisi Emmanuel Peti Kilian Mbappening “Real”ga ehtimoliy o‘tishi haqida fikr bildirdi.
“Real” Mbappeni katta pullar evaziga o‘ziga og‘dirmoqchi edi. Lekin vaziyat o‘zgardi. Nega? Chunki madridliklar o‘zini sotilgandek his qildi. Bilmadim, rostdan ham shunaqami-yo‘qmi, lekin vaziyat shunday.
Undan tashqari, “Real”da hozir Bellinghem bor. Aynan u yulduz. Klubda bir vaqtda porlab turadigan bir nechta yulduz bo‘ladi deyapsizmi? “Real” qanday tuzilganidan xabaringiz bormi? Barchasi boshqacha, u yerda juda ko‘p katta “ego”lar mavjud.
Mbappe “Real” tarixidagi navbatdagi futbolchi bo‘ladi, xolos. Klub bir necha bor Chempionlar Ligasini qo‘lga kiritgan, juda ko‘p “Oltin to‘p” egalari u yerda to‘p surgan. Ular bunga o‘rgangan.
Agar Kilian uyoqqa o‘tsa, o‘zining Mbappe ekanligini, dunyoning eng yaxshi futbolchilaridan biri ekanligini isbotlashiga to‘g‘ri keladi. Endi qiyin bo‘ladi, chunki uni bir yarim yil oldingidek iliq kutib olishmaydi.
Avvalroq, Mbappe “Real”ga o‘tishi haqida “PSJ” prezidentini ogohlantirmoqchiligi, Nosir al-Helayfi esa uning klub rahbarlari bilan shaxsiy kelishuvi borligi ma’lum qilgani aytilgandi.
