Buxoroda 32 yoshli ishchi o‘zini otib qo‘ydi
Buxoro Davlat universiteti talabalar turar joyi qozonxonasi ishchisi o‘zini otib qo‘ydi va voqea joyida vafot etdi. Bu haqda Bosh prokuratura axborot xizmati ma’lumot berdi.
Holat joriy yilning 10-yanvar kuni soat 16:20 da Buxoro davlat universiteti talabalar turar joyiga yaqin hududda sodir bo‘lgan. X.M. yotoqxonaga yaqin manzilda turgan o‘z avtomashinasiga o‘tirgan, yonida bo‘lgan pnevmatik qurolni qo‘liga olgan va ehtiyotsizligi sabab tana qismiga yaqin tutgan holda tepkini bosib yuborgan. Oqibatda o‘zining chap ko‘krak qismi jarohatlangan.
X.M. avtomashinasidan tushib, yotoqxonaning birinchi qavatida joylashgan tibbiyot punktiga birinchi yordam so‘rab borgan. Birinchi yordam ko‘rsatilgan, biroq qon yo‘qotishi oqibatida u vafot etgan. Holat yuzasidan tergovga qadar tekshirish harakatlari olib borilmoqda.
Marhumning o‘limi bo‘yicha sudga oid tibbiyot ekspertizasi tayinlangan.
