Messi, Holand va Mbappe. Bugun The Best sovrinining egasi aniqlanadi 

Angliyaning London shahrida 15-yanvar, dushanba kuni The Best sovrinini topshirish marosimi bo‘lib o‘tadi. 

Marosim Toshkent vaqti bilan 00:30 ta start oladi.

FIFA talqiniga ko‘ra, eng yaxshi futbolchi sovrinini olish uchun Erling Holand (“Manchester Siti”, Norvegiya terma jamoasi), Kilian Mbappe (“PSJ”, Fransiya terma jamoasi) va Lionel Messi (“Inter Mayami”, Argentina terma jamoasi) kurash olib boradi.

Eng yaxshi murabbiy sovriniga Pep Gvardiola (“Manchester Siti”), Simone Inzagi (“Inter”) va Luchano Spalletti (“Napoli” / Italiya terma jamoasi) kabi mutaxassislar nomzodi qo‘yilgan.

Eng yaxshi darvozabon sovrini uchun yakuniy uchlikka Ederson (“Manchester Siti”, Braziliya terma jamoasi), Tibo Kurtua (“Real”, Belgiya terma jamoasi), Yassin Bunu (“Al-Hilol”, Marokash terma jamoasi) kirdi.

Eng yaxshi ayol futbolchi sovrini uchun Aytana Bonmati (“Barselona”, Ispaniya terma jamoasi), Linda Kaysedo (“Real”, Kolumbiya terma jamoasi) va Jennifer Ermoso (“Pachuka”, Ispaniya terma jamoasi) kurash olib boradi. 

Pushkash nomidagi eng yaxshi golga Xulio Ensiso (“Brayton”), Nunu Migel Santush (“Sporting”) va Gilyerme Madruga (“Botafogo”) kabi futbolchilarning nomzodi qo‘yilgan.