Fransiyada tug‘ilish darajasi Ikkinchi jahon urushidan keyingi eng past darajaga tushib ketdi
Fransiyada 2023-yilda tug‘ilgan chaqaloqlar soni Ikkinchi jahon urushidan beri birinchi marta eng past ko‘rsatkichga tushdi. O‘tgan yil davomida mamlakatda 700 mingdan kam chaqaloq tug‘ildi.
Bu haqda Milliy statistika va iqtisodiy tadqiqotlar instituti (Insee) ma’lum qildi.
Unga ko‘ra, 2023-yilda respublikada 678 ming bola tug‘ilgan bo‘lsa, 2022-yilda 725 mingdan ortiq, 2010-yilda esa deyarli 833 ming nafar chaqaloq tug‘ilgan.
Sotsiologlarning taʼkidlashicha, 2023-yilda mamlakatda 631 ming kishi vafot etgan. Qolaversa, 2022-yilda bu ko‘rsatkich 675 ming kishini tashkil etgan bo‘lsa-da, Insee ma’lumotlariga ko‘ra, 2020-2022-yillarda mamlakatda koronavirus pandemiyasi bilan bog‘liq o‘lim ko‘rsatkichi oshgan.
Sotsiologlarning ma’lumotlariga ko‘ra, Fransiya aholisi 2024-yil 1-yanvar holatiga ko‘ra deyarli 68,4 million kishini tashkil etadi.
