Mashina buvisiniki bo‘lgan: Sirdaryoda egizaklar kanalda oqib ketgani yuzasidan yangi tafsilotlar ochiqlandi
Sirdaryo viloyati Guliston tumanida salonida o‘quvchilar bo‘lgan Gentra kanalga tushib ketgani haqida xabar berilgan edi. Bosh prokuratura holat yuzasidan “Daryo”ga ma’lumot berdi.
Unda aytilishicha, voyaga yetmagan M.I. tegishli hujjatlarsiz buvisi B.I. ga tegishli bo‘lgan qizil rangli Gentra’ni Guliston tumani, “Inoqlik” MFY hududidan oqib o‘tuvchi Do‘stlik kanali bo‘yidagi avtoyo‘lda boshqarib borayotib, boshqaruvni yo‘qotishi natijasida, mazkur kanalga tushib ketgan va yo‘l-transport hodisasini sodir qilgan.
Voyaga yetmagan M.I. yo‘l-transport hodisasini sodir qilgan vaqtda mashinada yo‘lovchilar, uning sinfdoshlari voyaga yetmagan S.V., S.V., N.I. va D.N. bo‘lgan. Yo‘l-transport hodisasi sodir bo‘lganidan so‘ng, avtomashinadan M.I., N.I. va D.N. avtomashina oynalarini sindirib, suvdan chiqqan, biroq voyaga yetmagan S.V. va S.V. chiqolmagan.
Gentra favqulodda vaziyatlar bo‘limi qutqaruvchilari tomonidan Do‘stlik kanalidan olib chiqilganda, voyaga yetmagan S.V. va S.V.larning murdasi topilmagan bo‘lib, hozirda ularni topish choralari ko‘rilmoqda.
Hodisa sodir bo‘lgan joy viloyat prokurori, viloyat IIB boshlig‘i, viloyat IIB boshlig‘i o‘rinbosari, tuman prokurori, tuman IIB boshlig‘i ishtirokida hamda viloyat tergov-tezkor guruhi, EKB ekspertlari, favqulodda vaziyatlar bo‘limi qutqaruvchilari, ishtirokida ko‘zdan kechirilib, protsessual tartibda bayonnoma rasmiylashtirildi.
