Yevropa Ittifoqi muzlatilgan Rossiya aktivlaridan Ukrainaga 5 mlrd yevro taqdim qilmoqchi
Yevropa Ittifoqi rahbariyati 24-fevralgacha Rossiya Federatsiyasiga qarshi 13-sanksiya paketini ma’qullashi, muzlatilgan Rossiya aktivlaridan Ukrainaga 5 milliard yevro yuborishi va to‘rt yil davomida yana 50 milliard yevro o‘tkazish bo‘yicha kelishib olishi kutilmoqda. Bu haqda Financial Times (FT) manbalariga tayanib xabar berdi.
Nashrning Yevrokomissiyadagi suhbatdoshlari sanksiyalarning 13-paketi parametrlari bo‘yicha kelishish jarayonini tezlashtirish rejalashtirilganini ta’kidlamoqda. Paket Rossiya Federatsiyasidan alyuminiy importini taqiqlashni o‘z ichiga olmaydi, chunki Polsha va Boltiqbo‘yi mamlakatlari buni talab qilmoqda, degan FT manbalari.
Materialda qayd etilishicha, Ukrainaga 50 milliard yevro miqdoridagi moliyaviy yordam bo‘yicha kelishish qiyin bo‘ladi (bu mablag‘lar yaqin to‘rt yil ichida ajratilishi rejalashtirilgan). Hozirda Vengriya rasmiylari bunga qat’iyan qarshi, ammo FT ma’lumotlariga ko‘ra, Bryussel maslahatlashuvlar davomida ularning pozitsiyasi o‘zgarishini kutmoqda.
Bloomberg avvalroq Yevropa Ittifoqi Rossiyaga qarshi sanksiyalarning 13-paketini muhokama qila boshlaganini yozgan edi. Agentlik manbalariga ko‘ra, u savdo cheklovlarini kuchaytirish, qora ro‘yxatlarni kengaytirish va Yevropa Ittifoqidagi uchinchi davlatlar va kompaniyalar orqali sanksiyalardan qochishni oldini oluvchi monitoringni o‘z ichiga oladi.
Avvalgi 12-sanksiya paketi 2023-yil 18-dekabrda qabul qilingan edi. Hujjatda birinchi marta Rossiyaning muzlatilgan aktivlarini musodara qilish imkoniyati qayd etilgandi.
