Qirg‘izistonda ham havo keskin sovib ketishi kutilmoqda
Qirg‘izistonda ham yaqin kunlarda havo harorati keskin sovib ketishi kutilmoqda.
Prognozlarga qaraganda, Qirg‘izistonga qattiq sovuqlar yaqinlashmoqda. Bir necha kundan keyin Bishkekda havo harorati 11-13 daraja sovuq bo‘lishi aytilmoqda.
17-fevral kuni havo juda sovuq bo‘lishi qayd etilgan. Mamlakatning aksariyat hududlarida qor yog‘ishi, ayrim joylarda kuchli yog‘ingarchilik bo‘lishi mumkin. Chuy viloyatida 18-fevral kuni kechasi 14 daraja sovuq, kunduzi 2-7 daraja sovuq bo‘lishi kutilmoqda.
Bundan avval Qozog‘istonda harorat 32 darajagacha sovib ketishi aytilgandi.
13—14-fevral kunlari Qozog‘istonning aksariyat hududlarida ob-havo keskin sovib ketishi kutilmoqda. Mutaxassislar yomg‘ir va qor shaklida yog‘ingarchilik bo‘lishi, shimoliy hududlarda kuchli qor yog‘ishi, yerlar muzlashini prognoz qilgan.
Shuningdek, Qozog‘iston g‘arbida havo harorati 5 daraja sovuq va 5 daraja iliqqacha; shimoliy, markaziy sharqiy viloyatlarda 5 daraja sovuq va 2 daraja iliqqacha ko‘tarilishi mumkin. Fevral oyining o‘rtalariga kelib siklon Qozog‘iston hududini tark etadi, uning o‘rnini qorsiz Arktika antisikloni egallaydi, u respublikaning shimoliy yarmiga sovuqni qaytaradi.
Mamlakatning g‘arbiy, shimoli-g‘arbiy va shimolida 15-fevralga qadar havo harorati kechasi 22-32 daraja, kunduzi 15-27 daraja sovuqqacha pasayishi kutilmoqda. Respublikaning qolgan hududlarida esa harorat bilan bog‘liq o‘zgarishlar bo‘lmaydi.
