Rossiyada Navalniy xotirasi uchun yig‘ilgan 200 dan ortiq odam hibsga olindi
17-fevral kuni Rossiya poytaxti Moskva va bir qancha boshqa shaharlarda amaldagi mamlakat rahbari Vladimir Putinning muxolifi bo‘lgan Aleksey Navalniy xotirasi uchun yig‘ilganlarni hukumat hibsga olishni buyurgan. Kuch ishlatar tuzilmalar hozirga qadar 212 nafar fuqaroni hibsga olgan. Bu haqda mahalliy nashrlarga asoslanib, Al Jazeera xabar berdi.
Bu voqea 2022-yilning sentyabr oyidan beri Rossiyada ro‘y bergan eng yirik ommaviy hibsga olish kampaniyasi bo‘ldi. Avvalgi noroziliklar Ukrainadagi harbiy operatsiyani insoniy resurs bilan taʼminlash maqsadida “qisman safarbarlik” joriy etilishi ortidan kelib chiqqan edi. Namoyishlarda 1300 dan ortiq kishi hibsga olingandi.
Rossiyada namoyishlar erkinligi haqida xabar beruvchi OVD-Info ma’lumotlariga ko‘ra, Navalniy o‘limi ortidan yuzaga kelgan norozilik holatlari Rossiyaning 21 shahrida kuzatilgan. Yirik shaharlardan hisoblangan Sankt-Peterburgda kamida 109 kishi, Moskvada esa 39 kishi hibsga olingan.
Xabarda aytilishicha, hibsga olinganlar soni bundan ham ko‘proq bo‘lishi mumkin. Ichki ishlar organlari namoyishlar bilan bog‘liq maʼlumotni taqdim etmaganligi bois, hibsdagilarning aniq sonini aytish imkonsiz.
