Isroil Braziliya prezidentini persona non grata deb e’lon qildi
Isroil tashqi ishlar vaziri Isroil Kats Braziliya prezidenti Luis Inasiu Lula da Silvani G‘azo sektoridagi urushni Holokost bilan solishtirgani uchun persona non grata (nomaqbul shaxs) deb e’lon qilgan. Bu haqda Isroilning i24 telekanali xabar berdi.
Yakshanba kuni Braziliya yetakchisi G‘azo sektorida sodir bo‘layotgan voqealarni genotsid deb ta’kidlab, buni Adolf Gitlerning yahudiylarga nisbatan munosabatiga qiyoslagan. Isroil bosh vaziri Binyamin Netanyaxu bunday bayonotlarni chegaradan o‘tish deb atadi. Avvalroq Kats Braziliya elchisi Frederiko Mayerga Lula da Silvaning bayonotlari munosabati bilan tanbeh bergan edi.
Tomonlarning hududiy manfaatlari bilan bog‘liq bo‘lgan Falastin-Isroil mojarosi ko‘p yillar davomida mintaqada keskinlik va janglarga sabab bo‘lib kelmoqda. 1947-yilda BMTning ikki davlat — Isroil va Falastin davlatlarining tashkil topishi to‘g‘risidagi qaroriga qaramay, faqat Isroil davlati tashkil topgan edi.
