O‘zbekistonda hafta davomida qanday ob-havo bo‘lishi ma’lum qilindi
O‘tgan hafta oxirida O‘zbekiston hududiga kirib kelgan sovuq havo massasi o‘z ta’sirini saqlab turadi, deb xabar bermoqda “O‘zgidromet”.
Ushbu hafta davomida havo harorati asosan kechalari 3-8 daraja sovuq, shimolda 7-12 daraja sovuq, ba’zi joylarda 16 daraja sovuqqacha, kunduz kunlari 19—20-fevralda 3 daraja sovuq-2 daraja iliq, 21—23-fevralda 0-5 daraja iliq atrofida bo‘ladi.
19-fevral kuni kunduzi viloyatlarda asosan qor ko‘rinishidagi yog‘ingarchilik bo‘ladi, faqat Qoraqalpog‘iston Respublikasi va Xorazm viloyatida yog‘ingarchilik kutilmaydi.
20-fevralda Farg‘ona vodiysi viloyatlarida, shuningdek kechasi va ertalab Toshkent, Samarqand, Jizzax, Sirdaryo, Qashqadaryo, Surxondaryo viloyatlarida biroz qor yog‘ishi mumkin.
21—23-fevral kunlari asosan yog‘ingarchiliksiz ob-havo bo‘lishi kutilmoqda.
Respublika bo‘yicha ba’zi joylarga tuman tushadi. Shamol shimoli-sharqdan 7-12 metr/sekund tezlikda esadi. Yo‘llarda yaxmalak kuzatiladi. Tog‘li hududlarda vaqti-vaqti bilan qor yog‘adi. Qor ko‘chish xavfi bor.
Toshkentda 19-fevral kuni kunduzi, shuningdek 20-fevralda kechasi va ertalab vaqti-vaqti bilan qor yog‘adi. 21—23-fevralda yog‘ingarchilik kutilmaydi. Kechasi va ertalab tuman tushishi mumkin. Harorat kechasi 3-8 daraja sovuq, kunduzi 19—20-fevralda 2 daraja sovuq-3 daraja iliq, 21—23-fevralda 0-5 daraja iliq bo‘ladi.
