Apple Vision Pro virtual reallik qurilmasi nimasi bilan foydalanuvchilarga yoqmadi?
O‘tgan yili ommaga taqdim etilgan Apple’ning yangi virtual reallik qurilmasi Vision Pro’ning ilk xaridorlari uni sotuv bo‘limlariga qaytarib bera boshladi.
Zamonaviy texnologiyalarning yangi bosqichi deb atalgan Vision Pro foydalanuvchilarga bir nechta noqulayliklar tug‘dirdi. Qurilmaning og‘irligi va vazni noto‘g‘ri taqsimlangani sababli foydalanuvchilar bo‘ynida og‘riqlar yuzaga kelgan. Bu kamchilik avval ham aytib o‘tilgan edi, ammo Apple kompaniyasi uni bartaraf etmagan ko‘rinadi.
Qurilmadan foydalangandan ko‘p vaqt o‘tmay ko‘pchilik ko‘z og‘rishi, bosh aylanishi va ko‘ngil aynishi kabilardan shikoyat qila boshladi. The Verge mahsulotlari menejeri aytishicha, Apple Vision Pro’ning nafaqat vazni og‘ir, balki boshga taqadigan tasmasi ham noqulay.
Biroq qurilmaning qaytarib berilishiga asosiy sabab sifatida juda kam ilovalardan foydalanish mumkinligi va 3500 dollar narxga munosib emasligi deb ta’kidlanmoqda. Reddit foydalanuvchilaridan biri buni quyidagicha izohladi:
“Agar men ushbu qurilmadan ish unumdorligi yoki hech bo‘lmasa virtual o‘yinlar uchun foydalanmasam, bunday xariddan naf ko‘rmayapman”.
