Xorazmda o‘qituvchi dars vaqtida o‘quvchi qizni ayovsiz kaltakladi (video) 

Xorazm viloyati Xonqa tumanidagi maktablarning birida o‘qituvchi dars vaqtida o‘quvchi qizni ayovsiz kaltaklagani aks etgan video tarqaldi. Viloyat maktabgacha va maktab ta’limi boshqarmasi holatga izoh berdi. 

Unga ko‘ra, o‘rganish natijasida holat Xonqa tumanidagi 36-sonli umumiy o‘rta ta’lim maktabida sodir bo‘lgani aniqlandi. Videolavhada aks etgan holat yuzasidan vakolatli tashkilotlar hamkorligida o‘rganish ishlari olib borilmoqda.

Shuningdek, Bosh prokuratura ham holat yuzasidan ma’lumot berdi. Hodisa yuzasidan ichki ishlar organlari tomonidan tergovga qadar tekshiruv harakatlari o‘tkazilayotgani qayd etilgan. Tekshiruv doirasida o‘quvchilarda tan jarohatlarini aniqlash maqsadida sudga oid tibbiy ekspertiza tayinlangan.

Tekshiruv harakatlari Xorazm viloyati prokuraturasi tomonidan nazoratga olingan.