Bayden Rossiyaning muzlatilgan aktivlari bo‘yicha G7 davlatlari qarorini kutmoqda
AQSH prezidenti G7 davlatlari iyun oyida Italiyada bo‘lib o‘tadigan sammitda Rossiyaning muzlatilgan aktivlaridan foydalanish bo‘yicha qaror qabul qilishiga umid bildirmoqda. Bu haqda Bloomberg xabar berdi.
Nashrga ko‘ra, Oq uy rahbari Rossiyaning muzlatilgan 280 milliard dollar aktivlaridan Ukraina byudjetini moliyalashtirish va tiklash uchun foydalanishga ishonadi. Bayden mazkur mablag‘lardan foydalanishni Ukrainaga qo‘shimcha yordam berishdan bosh tortish deb hisoblamaydi.
AQSHdan tashqari Buyuk Britaniya va Kanada vakillari muzlatilgan mablag‘larni musodara qilish kerak, deb hisoblaydi. Biroq Fransiya va Germaniya bunga qarshi. Ular Rossiyaning javob choralari va Yevropa iqtisodiyotining moliyaviy barqarorligiga salbiy ta’sir ko‘rsatishidan qo‘rqadi, deydi nashr. Bu masala iyun oyidagi sammitda hal qilinadi.
2023-yil dekabr oyi oxirida Rossiya prezidenti matbuot kotibi Dmitriy Peskov Rossiyaning muzlatilgan aktivlarini musodara qilish “jiddiy oqibatlarga olib kelishi” bilan tahdid qilgan. Peskovga ko‘ra, Rossiya bu holatda G‘arbning mamlakatda saqlanayotgan mavjud mablag‘larini musodara qilish orqali javob qaytaradi.
