“Qozog‘istondagi Ko‘kto‘be teleminorasi zilzilaga tayyor emas” — yapon olimi

Yaponiyalik olim Olmaotadagi Ko‘kto‘be teleminorasi zilzilaga tayyor emasligini ma’lum qildi. Bu haqda Tengrinews xabar berdi.

“Qozog‘istonda doktorlik dissertatsiyasini himoya qilgan yapon olimi, Osaka universiteti professori Olmaotada zilzila kuzatilishi, ko‘plab binolar seysmik silkinishlar ta’siriga tayyor emasligini aytdi. Ayniqsa, u Olmaotadagi uzoq yillar oldin qurilgan va allaqachon eski konstruksiyaga ega teleminoradan xavotirda.

Ya’ni, yaponlar bizdan ko‘ra Olmaota va Qozog‘iston janubidan ko‘proq xavotirda. Chunki bizda Yaponiyadagi kabi kuchli kamchiliklar bor”, — deydi Qozog‘iston geotexnika assotsiatsiyasi prezidenti Asqar Jusupbekov.

Olmaotaning yana bir ramzi bo‘lgan “Qozog‘iston” mehmonxonasiga kelsak, bu bino 70-yillarda zilzilaga tayyorgarlik uchun sinovdan o‘tgan. Seysmolog mehmonxona hatto sakkiz ballik silkinishga ham bardosh bera olishini ta’kidladi.

“Uning shakli oval, geometriyasi tufayli juda kuchli inshoot. U allaqachon bir necha zilzilalarga chidagan. Men bu binoda yoriqlar borligini hech eshitmaganman. Uning pastki qismi massasi yuqori qismga qaraganda ko‘proq va shundan kelib chiqib, to‘g‘ri qurilgan. Bu juda muhim”, — dedi seysmolog Muxtor Haydarov.

Eslatib o‘tamiz, 4-mart kuni Qozog‘istonning Olmaota shahrida 5 magnitudali, Qirg‘izistonda esa 5,2 magnitudali zilzila sodir bo‘ldi. Zilzila epitsentri Qozog‘istonning Olmaota shahridan 31 km janubda joylashgan. Uning magnitudasi 6,1 ni tashkil qiladi. Olmaotada zilzila kuchi 5 ballni tashkil qilgan.