Hindiston maktablarining birida sun’iy intellektga ega o‘qituvchi-robot ish boshladi
Hindistonning Trivandram shahridagi o‘rta maktabda sun’iy intellektga ega Iris ismli ilk o‘qituvchi-robot ish boshladi. Bu haqda “Pravila jizni” nashri xabar bermoqda.
Tashqi ko‘rinishi insonga xos robot hindcha milliy libos — sari kiygan holda dars o‘tadi va g‘ildiraklar yordamida harakatlanadi. Robot uchta tilda gapiradi: ingliz, hind va malay. U ovoz bilan turli mavzulardagi savollarga javob bera oladi va o‘quvchilar bilan har xil mavzularda muloqot qiladi. Mazkur robot-o‘qituvchi maktabda aynan qaysi fandan dars berishi hali ochiqlanmagan.
Iris dastlab Hindiston Transformatsiya Milliy Instituti tomonidan maktablarda darsdan tashqari mashg‘ulotlarni rivojlantirishga qaratilgan loyiha doirasida ishlab chiqilgan.
Loyiha egalari ushbu robot maktabdagi ta’limning yanada qiziqarli bo‘lishiga umid qilmoqda.
