“Tramp qayta saylansa, Ukrainaga bir tiyin ham bermasdan, urushni to‘xtatadi” — Vengriya bosh vaziri
Vengriya bosh vaziri Viktor Orban, agar AQSH sobiq prezidenti Donald Tramp noyabr oyida hokimiyatga qaytsa, Kiyevni moliyalashtirishni to‘xtatib, Ukrainadagi urushni tugatishi mumkinligini aytdi. Bu haqda CNN nashri xabar berdi.
“Tramp bu borada aniq rejaga ega. U qayta saylansa, avvaliga Ukrainani bir tiyinsiz qoldiradi. Tabiiyki, bunday sharoitda urush tugaydi, chunki Ukraina G‘arb pulisiz o‘zini tik tutib turolmaydi”, — degan Viktor Orban jurnalistlarga bergan intervyusida.
Xabarga ko‘ra, Viktor Orban hukumati Rossiyaning Ukrainaga keng miqyosli bosqini boshlanganidan beri doimiy ravishda Yevropa Ittifoqi va NATOning Ukrainaga yordam berish harakatlariga jiddiy qarshi bo‘lib kelgan. Ukraina uchun yordam paketlari ajratilishini tasdiqlash masalasini atayin cho‘zib kelgan.
Vengriya rahbarining bunday bayonotlari AQSHda xavotir uyg‘otgan. Vengriya ortidan butun Yevropada Ukrainaga yordamni to‘xtatish uchun harakat boshlanishi ehtimoli yuzaga kelgan. Polshada yuzaga kelgan fermerlar isyoni hukumatlarni Ukraina masalasida ehtiyotkor bo‘lishga chaqirayotgani taʼkidlangan.
“Agar amerikaliklar bu urushni moliyalashtirishdan to‘xtasa, urush tugaydi. Yevropaliklar o‘zi bu urushni moliyalashtira olmaydi”, — deya qo‘shimcha qilgan Viktor Orban.
