“Real” Kepa Arrisabalaga xizmatlaridan voz kechishi mumkin

“Real” bosh murabbiyi Karlo Anchelotti huquqlari “Chelsi”ga tegishli bo‘lgan darvozabon Kepa Arrisabalaga bilan klubdagi istiqboli haqida suhbatlashgan.

Kepa Arrisabalaga “Real Madrid”ning asosiy tarkibidagi o‘rnini ukrainalik Andrey Luninga yutqazib qo‘ydi va so‘nggi 11 uchrashuvni zaxirada o‘tkazdi.

Xabarga ko‘ra, Tibo Kurtua qaytib kelgach, Kepa jamoadagi “uchinchi darvozabon” pozitsiyasiga ko‘chiriladi.

Madridning “Real” klubi bosh murabbiyi Karlo Anchelotti bu holatni ispaniyalik darvozabonga shaxsan tushuntirib, “qirollik” klubida ham, “Chelsi”da ham raqobatni boy berishiga sabab bo‘lgan o‘yinidagi kamchiliklarni aytib o‘tgan.

Ma’lumotlarga ko‘ra, klub Kepaning joriy mavsum yakunida jamoani tark etishiga qaror qilib bo‘lgan.

Ayni damda “Real Madrid” Ispaniya chempionati turnir jadvalida 72 ochko bilan peshqadamlik qilmoqda.