“Maktabgacha va maktab ta’limi vazirligi hamda uning tizimidagi tashkilotlar faoliyatini samarali tashkil etish chora-tadbirlari to‘g‘risida”gi prezident farmoni bilan O‘zbekistondagi umumtaʼlim muassasalarida yuqori tezlikka ega internet tarif rejasi joriy qilinadi.
Hujjatga ko‘ra, umumiy o‘rta taʼlim muassasalarida o‘quvchilar sonidan kelib chiqib, 2024-yil 1-yanvardan boshlab Maktabgacha va maktab taʼlimi vazirligi tizimidagi taʼlim tashkilotlarida New Education tarif rejasi joriy etiladi;
Bunda:
- taʼlim muassasalaridagi bolalar sonidan kelib chiqib, New Education tarif rejasi internet tezligi hajmlari belgilanadi;
- taʼlim muassasalarida 400 nafargacha o‘quvchisi bo‘lgan umumiy o‘rta taʼlim muassasalarida internet tezligi kamida 40 Mbit/s, o‘quvchilar soni 400 nafardan ko‘p bo‘lganlarda – kamida 100 Mbit/s bo‘ladi;
- New Education tarif rejasining har bir tezlikdagi paketi uchun har oylik abonent to‘lovi miqdorlarini belgilash va bunda taʼlim tashkilotlari tomonidan internet xizmatlaridan tungi vaqtda foydalanilmasligi inobatga olinadi.
O‘zbekistonda internet tezligi
2022-yil dekabrda raqamli texnologiyalar vaziri Sherzod Shermatov O‘zbekiston aholisining internet xizmatidan foydalanuvchilari soni 31 milliondan ortganini ma’lum qilgandi. Vazirning qayd etishicha, xalqaro va shaharlararo telekommunikatsiya tarmog‘ini rivojlantirish maqsadida xalqaro internet tarmog‘iga ulanishning umumiy o‘tkazuvchanlik qobiliyati 2,6 barobar oshirilib, 3 200 Gbit/sekundga yetkazilgan.
“O‘zbektelekom” AK esa shu yilning mart oyida O‘zbekistonda 2023-yil mart oyidan boshlab mobil internet tezligi oshiriladi va mamlakat bo‘ylab 5G texnologiyasi joriy etilishini aytgan edi. Loyiha doirasida mavjud tayanch stansiyalari modernizatsiya qilinib, yangilari o‘rnatiladi.
Izoh (0)