“Мактабгача ва мактаб таълими вазирлиги ҳамда унинг тизимидаги ташкилотлар фаолиятини самарали ташкил этиш чора-тадбирлари тўғрисида”ги президент фармони билан Ўзбекистондаги умумтаълим муассасаларида юқори тезликка эга интернет тариф режаси жорий қилинади.
Ҳужжатга кўра, умумий ўрта таълим муассасаларида ўқувчилар сонидан келиб чиқиб, 2024 йил 1 январдан бошлаб Мактабгача ва мактаб таълими вазирлиги тизимидаги таълим ташкилотларида New Education тариф режаси жорий этилади;
Бунда:
- таълим муассасаларидаги болалар сонидан келиб чиқиб, New Education тариф режаси интернет тезлиги ҳажмлари белгиланади;
- таълим муассасаларида 400 нафаргача ўқувчиси бўлган умумий ўрта таълим муассасаларида интернет тезлиги камида 40 Мбит/с, ўқувчилар сони 400 нафардан кўп бўлганларда – камида 100 Мбит/с бўлади;
- New Education тариф режасининг ҳар бир тезликдаги пакети учун ҳар ойлик абонент тўлови миқдорларини белгилаш ва бунда таълим ташкилотлари томонидан интернет хизматларидан тунги вақтда фойдаланилмаслиги инобатга олинади.
Ўзбекистонда интернет тезлиги
2022 йил декабрда рақамли технологиялар вазири Шерзод Шерматов Ўзбекистон аҳолисининг интернет хизматидан фойдаланувчилари сони 31 миллиондан ортганини маълум қилганди. Вазирнинг қайд этишича, халқаро ва шаҳарлараро телекоммуникация тармоғини ривожлантириш мақсадида халқаро интернет тармоғига уланишнинг умумий ўтказувчанлик қобилияти 2,6 баробар оширилиб, 3 200 Гбит/секундга етказилган.
“Ўзбектелеком” АК эса шу йилнинг март ойида Ўзбекистонда 2023 йил март ойидан бошлаб мобил интернет тезлиги оширилади ва мамлакат бўйлаб 5G технологияси жорий этилишини айтган эди. Лойиҳа доирасида мавжуд таянч станциялари модернизация қилиниб, янгилари ўрнатилади.
Изоҳ (0)